اربعة اسباب تجعل تجربتى مع مطعم كنتاكى سيئة للغايه

 

 

 

كنا عائدين من المطار فى استقبال زوجتى العائده من الخارج فى سفرية قصيره واثناء العوده طلبت منى ان نأكل اى شيئ سريع لأنها مجهده وكنا فى هذا الوقت قريبين من المنيل فأقترحت عليهم كنتاكى منيل الروضه اللى فى محطة البنزين فوافقوا خاصة انها من الوجبات المفضله لأبنى

                                                              1  مستوى المطعم والترابيزات والكراسي

دخلنا المطعم وجلسوا هم على الترابيزه ودى كانت أول شيئ سيئ فمستوى الترابيزات والكراسي لايرقى ابدا لأسم المطعم وليس المستوى فقط بل النظافه ايضا المهم ذهبت لأطلب الأوردر

2  مستوى العاملين وطريقة معاملتهم للزبائن

ولكن الكاشير مش موجود وكانت امامى فى الدور سيده واولادها ينتظرون ايضا وبعد ذلك أتى شاب ووقف على جنب ينتظر ثم خرج الموظف من الداخل وأخذ مكانه على الكمبيوتر ليبدأ استقبال الطلبات ونظر الينا ثم نظر الى الشاب المنتظر جانبا وابتسم بشده وبدأ يرحب به ويتحدث معه وفجأه سأله عن طلبه ....... ازاى يعنى كانت هذه هى كلماتى اليه فنظر الي وقال لى فيه ايه قلت له فيه دور بنلتزم بيه قال لى هو جاى الاول فالسيده اللتى امامى قالت له لأ انا اول واحده ولما شعر بضعف موقفه والشاب قاله انا مش مستعجل مشيهم الأول بدأ فى التعامل معنا

تذكرت عند دورى ان شركة فودافون تزعجنى كل يوم برسائلها عن فليكس كوينز وكيف اننى يمكن ان استخدمه فى تخفيضات مختلفه خاصة فى مطاعم كنتاكى فقلت لنفسي انها فرصه للتجربه والاستفاده بالتخففيضات وطبعا نظر الي الموظف بقرف وقال لى أؤمر يا افندم قلت له هو انا ممكن أستخدم تخفيضات فودافون فقال لى للأسف السيستم مش شغال قلت له اى سيستم عندكم وألا فودافون قال لى الاتصال عندنا بيهم مش شغال فأيقنت انه بيقول اى كلام لمجرد الغلاسه فطلب الأوردر عادى وقال لى اتفضل استريح لغاية ما يجهز

3 مستوى الأكل وجودته

ذهبت الى الترابيزه وجلست انظر الى المكان وكيف هى مستويات الترابيزات والكراسي والتى لاترقى ابدا لأسم كنتاكى ولكنها على الأكثر تصلح لمطعم فول عالى شويه وان كنت قد دخلت مره مطعم فول فى المهندسين كان مستوى صالة الطعام ونظافتها اعلى كثيرا مما اراه الان

المهم بعد فتره ليست بقصيره لمحت الأوردر بتاعنا خرج من المطبخ ووضع على الكاونتر فذهبت واخذته وعدت الى الترابيزه وكان الأكل بصراحه أسوأ دجاج أكلته فى أى مكان بارد جدا وبعضها ناشف حتى الأرز سيئ رغم كده ونظرا للجوع والوقت بدأنا نأكل وخلاص

4 مستوى الأداره فى هذا المطعم

وبصراحه قررت ان أشتكى للمدير مما حدث وقبل ان ننتهى من الأكل حتى يكون هناك دليل على كلامى فقمت الى الموظفين وسألتهم عن مدير المكان فأشارت الانسه الى شخص يجلس على ترابيزه قريبه مننا وكان صوته عالى يحمل لابتوب على ىديه ويناقش موظف اخر فى مشكله ماليه بعصبيه ملحوظه ويجلس وسط الزبائن فتداكرت عندها من اين تأتى كل هذه المشاكل وطبعا تراجعت عن فكرة الشكوى

فى نهاية سألت نفسي ماذا حدث لهذا المطعم العالمى فقد كان بالفعل راقى وجميل ويقدم أحسن طعام فاست فوود وهل هذا هو حال كل الفروع فى مصر ام ان فرع منيل الروضه حاله فريده فى السؤ..............لا أدرى

تعديل المقال